喺著名兒童節目《芝麻街》裡面飾演大鳥同奧斯卡嘅演員Caroll Spinney,早幾日離世,令唔少粉絲惋惜。講開香港早期嘅兒童節目,最早可追溯至1960年代;除咗陪伴住好多人成長嘅《430穿梭機》、《閃電傳真機》、《至Net小人類》之外,當初仲有一個以打造東方《芝麻街》為目標而推出嘅《跳飛機》。

講起《跳飛機》,就不得不提佢嘅靈魂人物——Sunny哥哥(黃汝燊)。1976年,原本喺麗的電視做節目嘅Sunny哥哥被無綫高層邀請,擔任當時新開拍嘅兒童節目《跳飛機》嘅主持。《跳飛機》開頭想模仿《芝麻街》,加入公仔元素,Sunny哥哥就同填詞人鄭國江一人控制一隻公仔,喺節目入面演出。雖然當時本地電視台製作兒童節目嘅經驗唔多,不過就得多主持人嘅技巧搭救。Sunny哥哥除咗主持之外,亦兼任節目策劃、導師,會設計一啲魔術表演,又不時喺節目裡面調解小演員嘅紛爭,氹小朋友開心。

結果《跳飛機》推出之後爆紅,而Sunny哥哥嘅陽光形象亦深入民心。雖然呢個節目只係播到1982年,不過本地電視亦都由此慢慢摸索做兒童節目嘅經驗。

原圖嚟自辛尼哥哥歡樂家庭網。