始於1978年嘅改革開放，除咗促進中國嘅經濟發展，亦都令到國人嘅生活文化發生變革。喺改革開放之前，內地人嘅衣著都係以灰色、藍色嘅中山裝、解放裝為主，直至改革開放先至逐漸有西方衣著時尚進入中國，引領潮流。

喺1979年3月，法國著名時裝設計師皮爾卡登（Pierre Cardin），率領時裝表演團嚟到中國，喺北京民族文化宮舉行改革開放之後嘅第一場fashion show，為內地引入咗「時裝」、「品牌」嘅概念，可以話係內地時尚嘅啟蒙者之一。由此之後，外國唔少國際時裝品牌就開始陸續嚟到中國開拓市場。皮爾卡登曾經形容自己好似馬可孛羅，一樣有冒險精神。

原圖取自新華社。