有「中國古代四大美人」之稱,連月亮見到佢都匿埋喺雲後面唔敢出嚟獻醜嘅三國美女貂蟬,原本只係東漢重臣王允府中嘅歌女,因為見到王允煩惱國事、自己又幫唔到手而憂愁。王允望住貂蟬嘅傾城美貌,於是心生一連環美人計,而貂蟬為咗國家人民利益著想,亦甘願獻身。王允先係將貂蟬介紹俾呂布,等呂布對貂蟬動心,又將貂蟬獻俾董卓,令貂蟬得以喺呂布同董卓之間周旋,從而離間董卓同呂布嘅義父子情。

不過貂蟬只係出現喺《三國演義》,係作者羅貫中根據民間傳說同戲曲作品創作出嚟嘅虛構人物,响正史入面係無貂蟬呢個人嘅。據《三國志》所載,呂布的確有同董卓嘅侍婢私通,令佢心生不安、起咗反心。但《三國志》就無提侍婢個名,貂蟬呢個角色應該就係根據呢個侍婢原型創作出嚟。

原圖嚟自人民網。