新聞話內地春運車票12號起開始發售。講起春運,可能好多過年會返鄉下嘅港人都親身感受過果種墟冚場面,內地媒體亦都曾以「全球罕見嘅人口流動現象」嚟形容呢個中國特有嘅生活文化現象,而早喺1980年,內地《人民日報》就首次將呢個現象稱之為「春運」。

講到春運嘅出現,可以話同改革開放有密切嘅關係。喺1978年改革開放之後,有無數內陸地區居民都走到沿海城市打工,每到農曆新年,出於中國人傳統嘅家庭觀念,佢哋為咗可以一家團聚食餐年夜飯,都會盡量趕喺年三十晚之前返到鄉下;等過完年之後,佢哋又會再出返城市繼續工作,連同喺城市讀書嘅學生,所以每年呢個時候都會出現大量人口流動現象,對全國交通運輸造成壓力,火車票更加係一票難求。

而近年內地交通網絡完善,唔少鐵路同公路逐步落成,再加上內地民航業發展日益蓬勃,航班數目增加,令民眾有更多交通選擇。另一方面,近年亦有人為咗節省回鄉交通成本,選擇「反向春運」,將鄉下嘅家人接到城市過年,緩和咗大批打工仔回鄉時,大城市出現嘅真空情況。

原圖取自新華社。