最近有新聞就話，中美兩國達成首階段貿易協議。講起中美呢兩個當今世界舉足輕重嘅大國，當初正式建交，就要講到41年前嘅今日，即係1978年12月16日，中美兩國政府分別喺北京同華盛頓同時發表聯合公報，決定自1979年1月1日起，互相承認並建立外交關係。喺建交公報發表之後，中國領導人鄧小平就接受咗卡特嘅邀請，1979年1月訪問美國。

呢份聯合公報重申1972年上海公報裡面雙方一致同意嘅各項原則，並且再次強調，美國承認中華人民共和國政府係中國嘅唯一合法政府，台灣係中國一部分。而中美建交當日，美國政府就宣布與台灣斷交，終止美台「共同防禦條約」，從台灣撤出美國軍隊。

客觀上睇，中美聯合公報嘅發表，結束咗中美兩國長達30年嘅不正常狀態，亦都促進兩國之間經貿等領域嘅合作與發展，同時亦致力反對霸權主義。只不過時至今日，又係邊個喺度搞緊霸權主義呢？

原圖取自人民網。