上個星期講到南京舉行國家公祭，紀念南京大屠殺死難同胞。講起呢段歷史，當年日軍侵華暴行之所以能被公諸於世，多得一位美國傳教士，佢叫約翰．馬吉。日軍進行南京大屠殺期間，馬吉喺南京擔任國際紅十字會南京委員會主席同南京安全區國際委員會委員，設立難民傷兵醫院，參與救援中國同胞。當時，馬吉冒住生命危險，用一部家用攝影機日軍暴行拍攝咗落嚟，佢先後拍攝咗4盤膠片，總時長約105分鐘。呢一組被後人稱為「馬吉影片」嘅真實鏡頭，成為日軍當年進行南京大屠殺嘅鐵證，亦都係留存至今記錄南京大屠殺嘅唯一動態畫面。

日軍响1937年12月攻陷南京後，就喺城內大肆屠殺、姦淫擄掠。當時日軍對身處南京嘅外籍人士控制非常嚴格，更加禁止攝影、攝像。呢段105分鐘影片，有唔少都係响當時嘅安全區內拍攝，亦有部分係响安全區外拍攝，馬吉喺影片嘅引言中寫道：「必須小心謹慎地行動，攝影時千萬不可讓日本人看見。」

喺戰後，馬吉更親自出席遠東國際軍事法庭作證，佢當時咁樣描述自己喺南京嘅親身見聞：「令人難以置信的恐怖。在幾天內就迅速開始了屠殺，通常是單個的日本士兵，有時是30多個日本士兵一起四處遊蕩，每個人似乎都掌握着生殺大權，之後很快，就開始了有組織的大規模屠殺。不久南京便陳屍遍地，我曾經碰到過成隊的中國平民被押走殺害。這些人主要是被用步槍和機關槍殺害的。」

2002年10月2日，約翰·馬吉嘅兒子大衛·馬吉，將呢段「馬吉影片」捐贈畀侵華日軍南京大屠殺遇難同胞紀念館。

圖為馬吉以及佢拍攝嘅膠片，原圖取自人民網。