尋日講起約翰.馬吉呢位傳教士，喺日本侵華期間冒死拍下日軍喺南京大屠殺嘅暴行，今次就同大家講多少少馬吉其人其事。話說馬吉喺1884年10月生於美國賓夕法尼亞州匹茲堡市一個律師家庭，佢家族喺當地政界同商界都有一定影響力，曾經出過一位美國國會議員、一位州議員同一位市長，但馬吉就選擇咗一條與別不同嘅道路。1906年馬吉取得耶魯大學學士學位之後，就响劍橋聖公會神學院取得神學碩士學位，1912年當時係美國聖公會牧師嘅佢，毅然嚟到中國南京傳教。

嚟到中國之後，馬吉就請咗位中國教師，學習中文同中國文化，之後就喺南京租地方作為傳教場所，又同中國嘅牧師開咗間小學。後來佢喺家鄉籌錢，响南京下關買地興建教堂同新校舍，取名「道勝堂」。到咗1921年，佢仲同英國女傳教士菲絲女士結婚，喺南京落地生根。但佢嘅幸福生活好快就受到戰火嘅催殘。根據《侵華日軍南京大屠殺檔案》記載，1937年8月中至10月中呢兩個月，日軍就空襲咗南京65次，投下517枚炸彈，炸死392人，損毀房屋接近2000間，而馬吉就開始利用佢原本用嚟拍攝教會嘅攝影機拍低南京被轟炸嘅情況，以及日軍嘅暴行。

隨住戰事發展，當時唔少身處南京嘅外籍人士都開始向內陸或者上海租界遷移，馬克亦收到美國大使館嘅警告，要求佢離開，但馬克堅持留低協助照顧受傷難民，又同其他留守嘅外籍人士合作，建立安全區並設立多個難民收容所。後來佢又同安全區內嘅金陵大學醫院合作，設立難民醫院，每次喺日軍手上救出難民，佢都會將啲難民送到難民醫院，由於佢經常出入金陵大學醫院，馬克嘅影片入面有唔少畫面都係來自嗰度。

圖為馬吉同兒子合照，以及金陵大學醫院救治傷者截圖，原圖取自大公報、人民網。