香港地少人多、資源有限,所以多年嚟,香港嘅鮮活商品例如豬肉、家禽等都非常依賴內地嘅供應,其實早喺1911年,內地就透過鐵路運送鮮活商品嚟到香港,但由於當時只係以普通貨物方式運送,而且車程時間長,唔少禽畜未運到嚟香港就已經死得七七八八。新中國成立之後,上世紀60年代初,喺時任總理周恩來指示下,內地鐵道、外貿等部門就開通咗一個稱為「三趟快車」嘅運輸體系,將鮮活商品直送到香港。

喺1962年3月20日,運送供港鮮活商品嘅751次列車由武漢開出,30幾個車廂入面,有20幾個用嚟裝活豬。雖然當時列車開行咗52個小時,但已經將之前要八至十日嘅運輸時間大大縮短,所以發車兩日後嘅凌晨4點,呢趟列車抵達深圳,仲趕到香港嘅早市。之後喺周恩來指示下,同年12月,又增加由上海始發嘅753次、由鄭州始發嘅755次快車,自此「三趟快車」就成為內地供應港澳物資嘅基本政策。

上世紀80年代係「三趟快車」最鼎盛嘅時期,當時香港市面上有超過九成嘅活畜都係經「三趟快車」運送落嚟。當然,時至今日,隨住運輸系統嘅發展,效率同多樣性都大大提高,「三趟快車」亦於早幾年完成使命、淡出舞台,不過對於香港嘅歷史而言,「三趟快車」嘅作用可以話係舉足輕重。

原圖取自人民網。