阿史鍾意睇古蹟，有位鄉下喺廣州嘅同事就叫阿史去開廣州嘅話，就去中山七路嘅陳家祠睇睇。阿史上網一搵，原嚟呢個陳家祠就係陳氏書院，建於光緒十四年至二十年（1888-1894年），當初係用嚟祭祀祖先同埋為應考科舉嘅子弟提供居所。只不過，隨住科舉制度取消，陳家祠亦失去原有功用，變成讀書興學嘅場所，隨後又改建為民間工藝館。

陳家祠係迄今為止廣東省內規模最大、裝飾最精美、保存最完整嘅祠堂建築。佢集嶺南建築裝飾於一身，充分巧妙咁運用木器、磚雕、石雕、陶塑、灰塑、鐵鑄、彩繪等裝飾工藝，其中更有光緒年間全省民間藝人集體創作嘅雕刻繪塑，非常珍貴且具歷史保育價值。陳家祠曾經喺1958年維修，改建為廣東民間工藝館，展出具有濃郁民俗風情同地方特色嘅廣東民間工藝品。

之不過，經歷咗戰爭、文革等歲月洗禮，日久失修，陳家祠主體建築同周圍環境都被破壞得相當嚴重。好彩，政府喺1981年再一次修繕復原陳家祠，2年後對外開放，由原本嘅廣東民間工藝館，更名做廣東民間工藝博物館。

原圖嚟自廣州市政府網。