唔知大家有無留意，時至今日，好多髮型屋門口都會掛個紅白藍條紋嘅旋轉燈，離遠一望就知嗰度有間髮廊。咁大家又知唔知點解零零舍舍係紅白藍三隻色？又點解得髮型屋要掛呢種燈？呢個答案就要追尋返去中世紀嘅歐洲。

據講喺中世紀嘅歐洲，髮型師同時亦係業餘嘅外科醫生，會處理一啲簡單嘅外科手術，好似放血、拔牙、用水蛭吸血等。因為當時嘅人相信，身體唔健康係因為體內元素唔平衡，只要將多餘嘅元素引出嚟就會恢復健康，所以「放血」變成一種常見嘅治療方法。又因為嗰陣睇專業嘅醫生好貴，所以普通人家通常都係幫襯髮型屋做簡單治療。而好多髮型屋為咗俾人知佢哋有治療服務，會將顧客染血嘅繃帶捲喺長棍上，擺喺門口做招徠。直到後嚟先演變成無咁血腥嘅紅白藍旋燈，紅色代表動脈，藍色代表靜脈，而白色就代表繃帶。

亦有另一種講法話，喺法國大革命時期，有家髮型屋係革命黨嘅活動據點，亦多得入面嘅一位髮型師嘅掩護下，革命黨得以逃脫追捕，但呢位髮型師就不幸被殺。革命勝利之後，為咗紀念髮型師嘅功績，就用代表法國國旗嘅紅、白、藍三色作為髮型屋嘅標誌。

原圖嚟自maxpixels。