好多學生哥都想讀好書、成績好啲，但奈何又補習又捱「通頂」咁，成績都無大進步？咁可能係因為讀書方法唔正確，一於參考吓《圍城》作者、中國現在作家、文學研究家錢鍾書嘅讀書方法喇。錢鍾書一如其名，好鍾意睇書，睇完嘅書仲記得好清楚，可以話係個行走嘅圖書館、百科全書，佢與大家比較熟悉嘅國學大師饒宗頤並稱「南饒北錢」。錢鍾書對中西文化融會貫通之外，更精通英文、法文、德文、意大利文等多種語言，有咁嘅「功力」，除咗需要好記性，仲有賴於佢讀書嘅方法。

錢鍾書嘅太太楊絳曾經寫過一篇《錢鍾書是怎樣做讀書筆記的》，文章話「鍾書做一遍筆記的時間，約莫是讀這本書的一倍。」楊絳話錢鍾書之所以將讀過嘅書記得咁清楚，除咗得益於肯下苦功，仲同佢做筆記嘅方法有關。錢鍾書睇一本書，唔止睇一次，而係二、三、四次咁睇，而啲筆記亦會不斷添補；每睇一次書，錢鍾書都會發現之前疏忽、錯過嘅地方，咁樣邊睇書、邊做筆記，自然就加深咗記憶，做到唔單止記得，更重要嘅係理解。

圖為錢鍾書同楊絳，原圖嚟自新華社。