上次四中全會，阿史同大家介紹過，每屆中共中央委員會5年任期內，通常都會舉行7次全體會議，而每次都會有相對固定嘅主題。而要數對中國社會發展具有重要意義嘅其中一次全體會議，就不得不提1978年12月18至22日舉行嘅十一屆三中全會。

十年文革响1976年結束，2年之後舉行嘅十一屆三中全會成為中國未來發展路向嘅關鍵。十一屆三中全會確立咗鄧小平嘅領導地位，而呢次全會嘅中心議題，係討論將全黨嘅工作重點轉移到社會主義現代化建設，因此亦都成為中共歷史以至國家發展嘅一次重要轉折。

鄧小平喺呢次全會上面，發表咗一次著名嘅講話，題為《解放思想，實事求是，團結一致向前看》，其中就提到出「一個黨，一個國家，一個民族，如果一切從本本出發（即係教條主義），思想僵化，迷信盛行，那它就不能前進，它的生機就停止了，就要亡黨亡國。」呢番講話，對於推動成個國家建設發展起到關鍵性作用。

原圖取自央視。