2006年今日（19/12），香港樹仁學院正式升格為香港樹仁大學，成為香港首間私立大學。不過對於呢間大學嘅創辦人、胡鴻烈、鍾期榮夫婦嘅故事，大家又知道幾多呢？胡鴻烈、鍾期榮呢對高材生夫婦，喺民國時期已經係頂尖人物，佢哋嘅結合可以話係天作之合。而佢哋當初為咗創辦樹仁學院，足足奉獻咗自己畢生嘅積蓄。胡鴻烈更為咗興建校舍變賣跑馬地嘅屋企，喺遲暮之年依然返律師樓工作嚟賺取辦學費用，為樹仁盡心盡力。

樹仁前校長鍾期榮，當年以第一名嘅優異成績畢業於國立武漢大學法律系，佢隨後參加重慶全國高等文官考試，獲得司法組第一名，之後更成為中國首位女法官。而胡鴻烈就係當時外交官考試嘅狀元，當佢四處打聽邊個係司法界狀元嘅時候，咁啱鍾期榮要幫新一批外交官做司法訓練，就係咁，兩位狀元相遇，其後仲拍埋拖添。過咗無幾耐，兩人喺重慶拉埋天窗，外交官狀元配司法界狀元，傳為一時佳話。

1949年，鍾期榮同胡鴻烈一齊去法國巴黎大學留學，並喺獲得博士學位後嚟香港定居。 此後，鍾期榮先後喺聯合、浸會、珠海、崇基、崇華等院校任教，而胡鴻烈就喺英國考獲大律師資格後返香港做執業大律師。1971年，鍾期榮辭去教職，想喺住宅附近興辦一間幼稚園。但胡鴻烈就認為當時香港只得香港大學同中文大學兩間大學，學位短缺，好多中學生畢業之後都無乜升學出路，於是兩夫婦決定興辦一間大專學校，就係後嚟嘅樹仁學院。

多年之後講起辦學初衷，鍾期榮曾經講過，自己同丈夫都深受中國文化薰陶，但「一腔熱血，報國無門，慕古思賢，憂時憂國」，所以「不避萬難，要以愚公移山的精神，負起復興中國文化之重任」、培養出「仁人君子」，更加用「樹仁」二字嚟命名佢哋創辦嘅大專院校。

圖為鍾期榮、胡鴻烈，原圖嚟自cctv。