距離電影《鐵達尼號》首映已經過咗22年,《鐵達尼號》自1997年上映以嚟,一度創下咗全球21.87億美元嘅票房記錄,多年嚟一直穩居全球票房榜首,直至先後被2009年嘅《阿凡達》同今年上映嘅《復仇者聯盟4》超過,退居季軍。不過,講到全球最經典嘅愛情電影,《鐵達尼號》一定當之無愧,難以超越。想當年,阿史第一次睇《鐵達尼號》嗰陣仲細,唔明點解睇過嘅人都會喊。幾年之後再睇,先終於有啲明《鐵達尼號》嘅感動之處。

《鐵達尼號》成套戲最令人覺得遺憾嘅位,應該就係男主角阿Jack犧牲自己換嚟女主角Rose被救嘅機會,阿Jack死嗰一幕亦成為全套戲最大嘅淚點。但係,唔少人今時今日依然對阿Jack嘅死「耿耿於懷」,認為阿Jack當其時明明有機會爬上木板,同Rose一齊獲救,咁呢套戲就可以大團圓結局。對此,飾演阿Jack嘅里安納度就表示無意見。事實上,喺2年前《鐵達尼號》上映20周年嗰陣,導演占士金馬倫就解釋過呢個設定。佢話,當時阿Jack同Rose其實係可以並存嘅,但Jack嘅死係基於電影美學。即係話,無論Jack能唔能夠爬上木板都好,Jack始終都難逃一死。諗返轉頭,如果阿Jack唔死,又點能夠成就呢齣咁淒美動人嘅愛情故事呢?就係因為有遺憾,觀眾先會印象深刻,念念不忘啊嘛。

圖為《鐵達尼號》,原圖嚟自IG@titanicmovie。