阿史同同事周不時食完晏都會喺附近行吓，有時更加會行入啲商場鋪頭睇睇有咩新貨，但通常一大班人入去行個圈，乜都無買就出咗嚟，都真係幾混吉吓。

所謂「混吉」，係個貶義詞，又有啲「搞搞震，無幫襯」嘅意思。話說上世紀70年代，香港嘅茶餐廳，逢有客人入嚟，侍應都會奉上一碗免費清湯。因為碗湯入面係無料嘅，又叫做「空湯」，但「空」同「凶」同音唔吉利，所以「空湯」就叫做「吉湯」。當其時經濟唔好，好多人去茶餐廳都係為碗湯，飲完就走。呢啲齋入嚟飲碗「吉湯」、無幫襯就走嘅客人，啲侍應就會形容佢哋係「混吉」喇。

原圖嚟自網絡。