尋日同大家講咗樹仁大學嘅創辦人胡鴻烈、鍾期榮夫婦，為興建校舍、辦學盡心盡力，今日再同大家講多小小胡鴻烈嘅事蹟。胡鴻烈同太太一齊喺法國獲得博士學位之後，只係用咗兩年時間，就喺英國考到大律師資格，並回港成為香港最早嘅一批大律師之一。但係，當其時做大律師賺嘅錢遠遠無事務律師多，但為咗保留中國國籍，胡鴻烈毅然放棄做事務律師。

當時大部分修讀法律嘅學生畢業之後都會選擇做事務律師，因為市場需求大，賺嘅錢亦比做大律師多。 不過，嗰陣做事務律師就必須放棄中國國籍，胡鴻烈為咗保留中國國籍而選擇做大律師。

返嚟香港執業做大律師之後，胡鴻烈喺事業上一直平步青雲，其後更成為最早期嘅民選立法局議員。1979年，胡鴻烈獲邀返內地出席國慶30周年紀念活動，更獲國家領導人鄧小平接見。之不過，當時香港人要返內地唔容易，身為當時立法局議員嘅胡鴻烈更加要「事先必須申請批准，回來後還要寫報告」，但胡鴻烈通通唔理，仲話「愛國有理，大不了不做議員」。

原圖嚟自樹仁簡訊。