國家主席習近平日前嚟到澳門,出席慶祝澳門回歸20週年活動。喺1999年12月19日夜晚至20日凌晨,澳門舉行盛大嘅政權交接儀式,葡萄牙國旗同澳門市政廳旗緩緩降下,而喺踏入20號0時0分嘅一刻,準時奏響中國國歌、升中國國旗,象徵政權順利移交,澳門正式回歸中國。

葡萄牙人早喺16世紀就開始侵佔澳門,根據《萬歷廣東縣志》記載,喺嘉靖三十二年(1553年)葡萄牙人嚟到澳門,以船上貨物浸濕為理由,向海道副使汪柏要求借地方晾曬,並且賄賂汪柏答應,但點知葡萄牙人賴死唔走,越來越多葡萄牙人喺度居住同做生意。後來明廷同意葡萄牙人喺澳門居住,但就要每年繳交地租,換取居住權。

明清兩朝政府一直對澳門行使主權,喺澳門設置行政、軍事、司法同海關等管理機構,但直至1840年鴉片戰爭爆發,清廷簽下不平等條約,向英國割讓香港島,葡萄牙政府亦向清廷趁火打劫,強迫清廷簽訂《中葡和好通商條約》,同意葡萄牙永居管理澳門。

1979年中葡建交,兩國就澳門問題取得一致意見,同意通過友好協商解決,其後喺1987年簽署《中葡聯合聲明》,確認中國政府喺1999年對澳門恢復行使主權。

原圖取自人民網。