冬至快樂!今日係冬至,唔知大家今晚點做冬呢?成日都聽人講「冬大過年」,但究竟點解冬至咁重要?冬至係二十四節氣之一,亦係一年之中夜晚時間最長嘅一天。中國人相信呢天係最陰寒嘅日子,但同時亦代表陽剛之氣啱啱開始萌生,陽氣稍後會逐漸取代陰寒之氣,萬物將慢慢復蘇。所以,冬至乃係二十四節氣之始,為王者應該順應四時節氣,帶領大眾喺呢日休息,唔做操勞費力嘅事,以扶養微弱嘅陽氣。

既然冬至係應該休養生息嘅日子,咁古人喺呢日又會點過呢?早喺《周禮》就已經有記載,古人會喺冬至呢日祭天,夏至就祭地。去到北宋時期,冬至更加係「更易新衣,備辦飲食,享祀先祖。官放關撲,慶賀往來」嘅重要喜慶節日,非常受重視。喺冬至呢日,大家會互相送禮,一家人齊齊整整咁食餐飯同食湯丸,十足十我哋宜家聖誕交換禮物、過年去拜年咁熱鬧。

原圖嚟自香港旅遊發展局。