今晚就係平安夜，大家都會喺呢個時刻期盼和平、寧靜。原來喺1914年第一次世界大戰期間，戰場上敵對嘅英、法、德士兵都有過一個名符其實嘅「平安夜」，當時雙方陣營放低武器，仲走埋一齊互相祝福、贈送禮物，而且純粹自發，實在難得！

第一次世界大戰喺1914年7月爆發，喺同年年底、戰事爆發以嚟嘅第一個聖誕節前，有過百名「英國婦女參政運動者」聯署發表公開信，表達和平嘅意願，而當時嘅教宗本篤十五世亦呼籲各個交戰國政府簽訂正式休戰協定，希望至少喺「天使歌詠之夜」，讓戰火暫時停落嚟，但就冇得到一致響應。

喺果年平安夜當日，德國士兵喺戰壕上裝飾聖誕樹，當時啲英、法士兵都以為德軍喺度故弄玄虛，直至來自德軍嘅聖誕歌聲傳到英、法陣營嘅戰壕，英、法士兵都放低警覺，一齊唱聖誕歌。雙方士兵仲行出戰壕，喺無人地帶傾計、互送祝福、禮物。

根據一啲當時士兵嘅日記，英、德士兵喺聖誕節當日仲踢咗場足球友誼賽添，除咗踢波，雙方亦都趁住呢個非官方休戰時刻，埋葬戰死嘅同袍，又修補戰壕同防空洞。

圖為一戰法國士兵，取自新浪。