每到聖誕節，大家都會有好多「傳統節目」，例如食大餐、拆禮物、參加彌撒等等，不過除此之外，好多國家仲有一啲好奇特嘅聖誕節目，今次就簡單同大家介紹下。

喺英國，有一項非常浪漫但又好古怪嘅習俗，就是喺槲寄生（一種植物）下唔可以拒絕別人嘅吻；而在槲寄生之下接吻嘅情侶，據說就可以長相廝守，一直幸福到老。早喺1791年12月27日嘅倫敦報紙《The star》入面，就曾經提到呢個現象：「很多地方盛行在有槲寄生灌木叢中接吻。」

喺傳說中聖誕老人嘅故鄉——芬蘭，每到聖誕夜時，父親或鄰居就會扮做聖誕老人，去到有小朋友嘅家庭，分發禮物、唱聖誕歌，氣氛歡快又溫馨。

喺瑞典，當地耶夫勒市中心嘅方堡廣場，每年12月都會有一隻用稻草做嘅巨型耶夫勒羊，高達13公尺。呢隻羊最早出現喺1966年12月，但果年新年前夜，就被人點火燒咗，於是由此開始，每年燒掉山羊就成為一個當地嘅另類聖誕傳統活動。

而喺奧地利，亦都有一個坎卜斯（Krampus）遊行，呢個遊行源於阿爾卑斯山一個民間傳說，就話聖誕節期間，聖尼古拉（基督教聖徒，有人話係聖誕老人嘅原型）會分派糖果同禮物俾乖嘅小朋友，而坎卜斯就懲罰曳嘅小朋友，於是每年聖誕節，民眾就會打扮成坎卜斯咁遊行，非常熱鬧。

另外，喺南半球嘅澳洲，當然一樣都會歡度聖誕節，不過十二月嘅澳洲係夏季，所以大家會著住短袖短褲甚至比堅尼嚟過節喇。

原圖取自新華社。