上個星期，中國自主設計、製造嘅第一艘航空母艦山東艦正式服役。時至今日，要自行建造一艘航母已經唔係咩「難事」，不過喺新中國成立之初，要打造中國嘅海軍力量就絕對唔容易。喺49年前嘅今日，即係1970年12月26號，中國第一艘核潛艇「長征一號」成功下水，研製過程可以話充滿艱難。

喺上世紀50年代開始，美國、蘇聯等國家先後擁有核潛艇，經受過核威脅、欺凌嘅中國意識到，要有自己嘅核潛艇。但當時嘅中國，剛成立冇耐，各種資源都非常有限，建造核潛艇方面嘅知識更加係近乎零，當時研製人員手頭有嘅，只得幾張模糊不清嘅外國核潛艇照片同埋一個玩具模型，就算之後有一啲文獻資料，又全部係洋文。要自己搞核潛艇，得一條路，就係 “自學自教”。

1958年，中國開始核潛艇嘅研制，上世紀60年代初曾暫停，之後項目又重新啟動。當時，由中國潛艇核動力之父、中國工程院資深院士彭士祿主持核動力裝置嘅設計、試驗以及運行。終於喺1970年12月26日，中國研製嘅第一艘核潛艇成功下水，到1974年8月1日正式服役，中國成為繼美、蘇、英、法之後，第五個擁有核潛艇嘅國家。

圖片為長征一號核潛艇，取自青島新聞網。