之前阿史執屋執出一大疊舊相，其中有一張係阿史爺爺後生嗰陣影嘅，佢著住件中山裝，特別莊重嚴肅。講起中山裝，自然就同孫中山有關，係佢參照南洋華僑嘅企領裝、西裝等服裝樣式特點設計而嚟，係民國時期嘅男士正裝。不過原嚟，中山裝上面有幾多個袋、幾多粒鈕都好有講究，有特別嘅含義。

中山裝嘅特點係企領、對襟，前襟有五粒紐，四個衫袋，而袖口位就有三粒紐，後面不破縫，呢啲制式，每一樣都有寓意。首先，前襟嘅五粒紐，代表五權分立，即係行政、立法、司法、考試、監察。其次，四個袋係代表「國之四維」，即禮、義、廉、恥。而袖口嘅三粒紐，就表示民族、民權、民生。至於後背不破縫，即係背面用一整塊布製成，中間無縫就代表國家和平、統一。

圖為7粒扣嘅中山裝嘅雛形，原圖嚟自上海孫中山故居博物館。