聖誕快樂！今日係聖誕節，唔知大家有咩節目呢？有無去中環個摩天輪湊吓熱鬧呢？講開摩天輪，原嚟香港早喺1949年已經出現，佢就位於北角英皇道嘅月園。當時呢個摩天輪被宣傳為「兔起鶻落，突然沖天，有驚無險，可以考驗膽汁」，望落個樣同宜家嘅一個個車廂嘅摩天輪有啲分別，但已經係當時非常先進嘅機動遊戲。

講起月園（Luna Park），可能要有返咁上下年紀嘅老友記先會識，佢喺1949年12月臨近聖誕節時開幕，係由「糖王」郭春秧嘅幾個仔同一個猶太商人斥資600幾萬而成，想將月園打造成「遠東最大瑰麗絕倫遊戲園夜總會」，係一個結合主題公園、戲院、夜總會嘅娛樂綜合體，其建築規模之大、成本之高簡直一時無兩。月園除咗有夜總會之外，亦有深受小朋友歡迎嘅機動遊戲，例如摩天輪、運轉鴻鈞（旋轉木馬）、巨型扒山車（過山車）等，同宜家嘅主題公園差唔多。

宜家月園嘅位置已經變成住宅區，就喺北角月園街一帶。

原圖嚟自Gwulo。