阿史出年又有朋友結婚，仲邀請阿史做兄弟，不過諗起到時又要晨咁早起身跟住新郎接新娘、被班姐妹團玩、頂酒等等，阿史就有啲怕怕，遲遲未肯覆個朋友。再加上「兄弟」仲有另一個名，叫做戥穿石，阿史唔多想做多次戥穿石囉。不過大家又知唔知點解有個咁奇怪嘅名？

話說以前農民拎屋企養得肥肥白白嘅豬去賣嘅時候，會用一條擔挑嚟抬隻豬。但係，好多時豬就得一隻，要保持擔挑兩邊平衡，就要喺另一邊擺一嚿同豬差唔多重嘅石頭。「戥」有平衡、稱量物品嘅意思，由於嚿石頭係用嚟「戥」勻隻豬嘅，所以就叫做戥豬石。當農民賣咗隻豬之後，戥豬石就無用喇。

後嚟，啲人覺得「戥豬石」嘅叫法有欠尊重，又因為「豬」同「穿」讀音有啲相近，就講成「戥穿石」喇。

原圖嚟自網絡。