粵劇被列入人類非物質文化遺產已經10年，粵劇能夠喺藝術界佔得一席位，除咗因為粵劇本身嘅魅力外，仲有賴一眾為宣揚粵劇出心出力嘅前輩。而講到20世紀粵劇嘅代表人物，就不得不提粵劇大師紅線女，女姐。

紅線女，原名鄺健廉，生於1924年12月，今年啱啱係95周年。佢12歲就跟住舅母學粵劇，初時藝名叫「小燕紅」。直到15歲獲名伶馬師曾賞識，提拔做正印花旦，改藝名「紅線女」。紅線女得到多位名家教導，創造咗具自己特色嘅「女腔」。紅線女拍住馬師曾，合作演出粵劇著名劇目《搜書院》、《昭君出塞》、《關漢卿》等。拍檔之外，紅線女同馬師曾亦曾有過一段婚姻，生咗兩仔一女。

1947年，紅線女初登銀幕，演出佢嘅第一部電影《藕斷絲連》。此後，紅線女喺香港同內地共主演超過90部電影同100多齣粵劇，瘋魔萬千戲迷。1955年，紅線女同馬師曾返廣州，領導「廣東粵劇院」同「廣東粵劇團」，之後更創辦「紅豆粵劇團」，培養咗眾多粵劇人材。

唔講唔知，原來紅線女生前唔單止孜孜不倦培養粵劇接班人，仲為咗擴大粵劇受眾，親自策劃、創作咗首部粵劇動畫電影《刁蠻公主戇駙馬》，亦都係世界動畫史上第一部以粵劇故事為主題嘅動畫電影；至於講到點解會挑選《刁蠻公主戇駙馬》嚟作嘗試，紅線女就表示，係因為呢套戲表達咗中華民族「和為貴」嘅主題。

原圖嚟自文匯、香港中文大學民間歷史。