想喺銀行戶口攞錢出嚟，唔少人都會選擇响自動櫃員機（Automatic Teller Machine，簡稱：ATM）撳錢，喺電子支付普及之前，可以話無咗佢唔得。喺ATM面世之前，想攞錢就唯有喺銀行排隊，以前啲人就係咁每日浪費唔少時間排隊，直至1967年英國人約翰·巴倫發明咗第一部ATM，改變咗民眾攞錢嘅習慣，更加有趣嘅係，發明ATM嘅靈感，竟然係來自朱古力自動販賣機。

約翰·巴倫1925年生於蘇格蘭一個中產家庭，就讀過劍橋大學，亦參加過空軍，25歲嗰陣進入一間著名嘅印鈔公司工作。由於工作關係，約翰·巴倫每個禮拜六都要去銀行攞一次錢，令佢飽受排隊之苦，於是佢就開始諗，到底有咩方法可以隨時隨地攞錢。佢認為，無論係喺英國定係世界上任何地方，「我都應該有方法攞到自己嘅錢」。結果佢就諗到，可以借鑒自動販賣機嘅原理，製造一部可以隨時提取現金嘅機器。

於是佢就將呢個創意講解畀同印鈔公司有合作嘅巴克萊銀行聽，好快就得到銀行方面嘅認同，並全權委託佢先製作六部ATM。而世上第一部ATM，就係响1967年6月27日喺巴克萊銀行嘅外牆上正式面世。之不過，約翰·巴倫就未曾為發明ATM申請專利，而其他銀行亦都開始仿傚並改良ATM，加入呢個市場。

原圖取自文匯報。