1941年12月，侵華日軍攻佔香港後，喺當年嘅12月28號舉行咗所謂「入城式」。養和醫院首任院長李樹芬喺佢嘅回憶錄《香港外科醫生》入面，就記載咗唔少當時日軍入城後嘅暴行。

李樹芬喺回憶錄入面講到，1941年「黑色聖誕」嘅後一夜，一批日本兵喺養和醫院對面嘅山光飯店大吃大喝，「醉後便四處搶掠，強姦和殺人」，「救命之聲此起彼落，還有人敲擊鐵罐求救。」日兵甚至「強行進入醫院，搜尋護士」，李樹芬就帶住夜班女護士躲避。翌日佢先得知，「有幾位外國籍的護士不論年齡，除及時逃掉者外，皆被日軍姦污。」

之後，日軍總醫官江口仲搵到李樹芬，竟然係話日軍想喺香港設立「慰安區」；李樹芬反對，拒絕提供意見，但江口並無理會，仲將計劃「迅速實施以及發展」。當時李樹芬慨嘆：「日本人把香港這個交通樞紐之地，改作了皇軍慰安所，人慾橫流的淫穢地獄。」

圖為日軍入城式情形，原圖嚟自《香港日佔時期》。