宜家上網買嘢越嚟越方便，可以足不出戶就買到世界各地嘅產品；網購亦都帶旺咗速遞、送貨行業，不過原嚟送快遞並唔係近幾十年新興嘅行業，早喺中國漢代就已經出現，嗰陣交通落後，都係主要靠馬匹嚟送貨。

古代嘅郵政系統叫做「驛傳」或者「郵驛」，主要負責政府嘅公文往來同傳遞軍情，有時亦會承擔一啲物資運輸工作，不過就只限官方使用。至於運輸速度就每個朝代都有啲唔同，漢代馬遞最快嘅速度係日行四百里，唐代就規定每日車行至少一百二十里，騎馬一百八十里，而皇帝頒佈嘅敕令就必須日行五百里。最出名嘅例子係唐玄宗為咗搏紅顏一笑，五百里加急送荔枝嚟俾楊貴妃食。

到咗清朝，文書傳遞嘅速度提高到一個晝夜跑六百里甚至八百里。尤其係咸豐、同治時期，由於戰火不斷、軍情緊急，就出現咗「紅旗報捷」，一旦前線打咗勝仗，就即刻以八百里嘅速度通報，沿途驛站都會準備好馬匹，驛站職員一聽到鈴聲即刻飛身上馬，跑去下一站，呢個就係我哋睇清宮片成日聽到嘅「八百里加急」。

原圖嚟自網絡。