我哋宜家好多關於古代嘅知識，有唔少都係靠考古學家挖掘出嚟嘅文物、文獻推斷得知，但如果想了解多啲中國古代嘅法律，1974年12月出土嘅雲夢睡虎地秦簡就好有參考價值喇。

雲夢睡虎地秦簡又叫做睡虎地秦簡、雲夢秦簡，因喺湖北省雲夢縣睡虎地十一號墓發現而得名。呢批秦簡共1155塊，係迄今為止發現數量最多、體系最完善嘅秦代法律文書。雲夢睡虎地秦簡其實係由秦朝一個叫「喜」嘅官吏所抄錄嘅文件，呢啲文件包括十八種秦律、編年紀、為吏之道等。由民生嘅農田水利、牛馬飼養等民法，到貿易嘅工商管理、貨幣流通嘅經濟法，再到刑徒監管、官吏任免、軍爵賞賜等軍法、刑法，就連山林保護方面嘅法律條文都有記載，可以話係應有盡有。有內地文物專家就曾經笑談雲夢睡虎地秦簡，係世界上最早嘅刑事偵查書籍、最早嘅消費者保護法，亦係最早嘅保護環境法律條文等等。

雖然喜抄錄嘅只係秦代法律嘅一啲律文摘抄，並唔完整，但比起西方嘅封建法典，出現時間足足早咗1000年。中國現存最完整嘅古代法律以唐律為最早，秦律早已亡佚，雲夢睡虎地秦簡除咗彌補呢批缺失嘅秦律空缺之外，仲可以修補《史記》關於戰國歷史記載嘅不足，有助研究秦國統一全國嘅歷史。

原圖嚟自網絡。