由聽日即係元旦日開始，歐洲國家荷蘭就將統一改用正式國名「Netherlands」（尼德蘭），並停止沿用咗廿幾年嘅「Holland」（荷蘭）呢個名稱。大家可能會覺得呢次改名改得好突然，但其實荷蘭原本嘅正式英文名就係「The Kingdom of the Netherlands」，所以今次並唔係改名，只係用返原名。

我哋平時叫開嘅「荷蘭」，其實只係尼德蘭國內兩個省，即係阿姆斯特丹所在嘅北荷蘭省，同鹿特丹、海牙所在嘅南荷蘭省。因為呢兩個省長期係尼德蘭嘅經濟、政治、文化中心，久而久之，「荷蘭」就慢慢變做尼德蘭嘅代名詞，所以係中文、英文、日文入面，都係用「荷蘭」嚟代表尼德蘭。

而當地旅遊部門喺25年前，就喺旅遊宣傳度用「荷蘭」呢個名，連官方旅遊網站都用Holland.com，所以咁耐以嚟大家幾乎都忘記咗「尼德蘭」呢個本名。不過，當地外交部認為，剩係用「荷蘭」呢一小部分去推廣、代表成個國家，「做法有點奇怪」，因此決定趁新年打造新形象，全面正名為「Netherlands」。另外，之前橙色鬱金香配「Holland」嘅標誌亦會被新推出嘅「NL Netherlands」國家標誌取代。

原圖嚟自文匯。