新年快樂！今日係2020年嘅第一日，又叫做元旦，宜家嘅元旦就泛指公曆紀年嘅1月1號，但唔講唔知，原嚟元旦喺辛亥革命之前都曾經係農曆新年。

 「元旦」一詞最早起源於三皇五帝之一嘅顓頊，原本係指正月第一日，距今已經有成5000幾年歷史。喺現代曆法嚟講，地球圍繞太陽轉一圈就為之一年，但由於地球繞太陽運轉無固定嘅起點同終點，所以一年嘅起始都係由人定嘅。《史記》記載，喺上古時候，曆法以孟春月作為正月，孟春月係春季嘅首月，呢個時候冰雪開始融化，萬物啱啱蘇醒，正好作為一年之始。嚟到殷朝，就以十二月為正月，周朝嘅正月係十一月。直至秦統一天下，注重五行相生相剋，取咗水為祥瑞，將十月一日定為元旦，呢個曆法亦被漢高祖沿襲。直至漢武帝頒行《太初曆》，規定孟喜月（元月）為正月，孟喜月嘅第一日係元旦。

 漢武帝頒佈嘅呢個曆法又叫「夏曆」，即係宜家嘅農曆，一直沿用到清朝末年。辛亥革命之後，各省都督代表就決定轉用西曆，將西曆嘅1月1號定為「元旦」。而新中國成立之後，亦決定採用世界通用嘅西元紀年法。為咗區別農曆同西曆兩個新年，又鑒於農曆二十四節氣中嘅「立春」啱啱好喺農曆新年前後，於是就將農曆一月初一改稱為「春節」，西曆1月1號定為「元旦」。

原圖嚟自網絡。