喺41年前嘅今日,即係1979年1月1日,全國人大常委會發表咗《告台灣同胞書》,受到廣泛關注,其影響力亦一直持續到今天。不過可能唔係太多人知道,呢份咁重要嘅對台文件,原來係出自兩個人嘅手筆,佢哋就係時任中國社會科學院院長、國務院研究室主任胡喬木,以及當時人民日報國際部負責人譚文瑞。而成份文件嘅起草過程,前後只係大約四日時間,而且鄧小平隻字未改。

話說喺1978年12月17日,十一屆三中全會前夕,鄧小平就指示胡喬木負責起草一份有關台灣問題嘅重要文稿,於是胡喬木就搵嚟譚文瑞,要佢喺三、四日之內草擬初稿,同時傳達鄧小平嘅意見,包括和平統一嘅意願同政策、唔再用「解放台灣」嘅口號、宣布停止炮擊金門等沿海島嶼、提出兩岸通航、通郵、通商等等。

胡喬木又特別叮囑,呢份文件要面對台灣老百姓同台灣當局,行文唔使用黨報社論格調,語氣要委婉平和啲,可以半文半白,適應台灣同胞習慣,等台灣民眾聽得入耳 。譚文瑞用咗4日時間寫完初稿,胡喬木稍作修改之後,就交俾鄧小平審閱;鄧小平由頭到尾聽咗一次,即場拍板認可、隻字未改。

1979年1月1日,呢份《告台灣同胞書》正式發表。

原圖取自新華社。