就中國近代史嚟講，今日係相當重要嘅一日，响1839年1月3日，即181年前嘅今日，道光皇帝正式任命湖廣總督林則徐為欽差大臣，負責主持查禁鴉片。

早喺1773年，英國東印度公司已經開始大量生產鴉片，之不過早年英國政府並唔支持販賣鴉片，認為咁樣有損國家體面，甚至仲推出《東印度公司改革法案》，限制東印度公司喺中國嘅貿易專利權、壟斷權。

實際上，就算去到道光年間，清政府仍然係唔允許喺陸地上售賣鴉片，於是英商取巧地將鴉片倉庫設喺「躉船」上，停泊喺伶仃洋一帶，等中國商人可以「接貨立券」。鴉片嘅流入令到清朝產生唔少社會問題，國民身體健康、白銀外流等問題，令到曾經食過鴉片嘅道光皇帝不得不思考全國禁鴉片。

全國二十八省將軍、總督和巡撫，就只有九個名督撫贊成鴻臚寺黃爵滋禁鴉片嘅主見，後來因為道光皇帝眼見林則徐先後响江蘇、湖廣禁鴉片嘅成功，令到道光皇帝都下定決心，先革除慶親王奕竇、輔國公溥喜爵位，再連續八日召林則徐入京商談禁鴉片事宜。

林則徐奉命為欽差大臣之後，就到咗廣東查封鴉片。响接落嚟嘅數個月，繳煙二萬零二百八十三箱，並响虎門公開銷煙。而呢個舉動亦都觸動到當時英國嘅神經，後來仲成為爆發第一次鴉片戰爭嘅導火線。

圖片嚟自網絡