1991年1月4日，即29年前嘅今日，台灣著名作家三毛逝世，終年47歲。就算到咗今日，呢位當代傳奇女子响全球各地仍然有唔少書迷粉絲，佢嘅文字當中，流露住真性情、神秘又離奇，充滿住對愛情嘅執著、流浪同埋回憶。

三毛原名陳懋平，响重慶出世，抗日戰爭之後轉輾去咗台灣生活。中學時代嘅佢就過得並唔順利，一度休學。不過佢响個陣就遇到佢嘅啟蒙老師顧福生，雖然顧福生係教佢畫畫，但就鼓勵佢响文學創作路上發展。亦因為顧福生，令三毛認識著名作家白先勇，展開咗投稿之路。後嚟佢响文化學院期間，三毛就曾經去過西班牙、德國同埋美國等地遊學，亦都經歷多次情傷。

令三毛成名嘅地方叫做西屬撒哈拉，喺呢度佢同一個叫荷西嘅西班牙人墜入愛河，並展開《撒哈拉的故事》。當時三毛係應台灣《聯合報副刊》主編平鑫濤邀請，以三毛做筆名，介紹西屬撒哈拉沙漠所見所聞。同佢以往嘅純文學風格風格唔同，呢一系列充滿異國風情嘅生活散文，帶出咗三毛樂觀開朗嘅一面同埋愛情觀，廣受全球華人嘅歡迎。

1991年1月4日，三毛因為子宮內膜增生症住院，最後就被發現以絲襪自縊死亡，終年47歲。