約翰·拉貝—南京大屠殺的見證者

1937年南京被日軍攻陷後，南京城內曾經出現一個難民區，庇護過25萬中國難民，被稱為南京安全區。而倡議建立呢個安全區，其中一位就係約翰·拉貝。

拉貝係一位德國人，响上世紀三十年代係德國西門子公司駐華總代表。1937年12月，國民黨軍隊响南京保衛戰被日軍打敗後，民國首都南京淪陷。而响南京未淪陷之前，南京當地廿幾個歐美僑民成立咗個委員會，提倡成立一個安全區，保護各國僑民以及當地平民。由於拉貝本身係一位德國納粹黨員，所以唔少人都選咗佢做安全區國際委員會主席，希望基於日本同德國嘅關係令安全區發揮到更大作用，可惜最後呢個安全區並無發揮到預期作用。

當時响南京嘅拉貝，就通過照片同文字記錄低日軍响南京嘅各種暴行。不過，拉貝記錄低嘅資料要到佢死後46年，即1996年先由佢外孫女公諸於世，而《拉貝日記》就成為咗南京大屠殺嘅重要史料。