屈臣氏原來都成二百年歷史？

依家提起屈臣氏，相信都冇乜史友會唔識，但呢個全球有成6300幾家分店嘅品牌，原來並唔係由誠哥創立，如果認真追溯，屈臣氏分分鐘仲係中國歷史最悠久嘅藥房之一。

有關屈臣氏嘅歷史，最早就可以追溯到1820年由皮爾森及李文斯頓响澳門創立嘅「澳門藥房」，而再過8年，呢兩位外國人仲去到廣州沙面開埋「廣東大藥房」。皮爾森及李文斯可能有啲開鋪癮，喺1841年香港被割讓嘅年份，佢哋仲嚟埋上環開設「香港大藥房」，真係用盡曬所有地名。

講咗咁耐，點解仲未有姓屈嘅人出現呢？原來要去到1855年，呢位叫做托馬斯·屈臣嘅人先正式加入香港大藥房，仲帶埋佢個擔任藥劑師嘅侄亞歷山大·斯柯文·屈臣（Alexander Skirving Watson）齊上齊落，接手藥房。去到1871年，可能因為老屈臣年事已高，小屈臣就直頭接手，將成間藥房改名做屈臣氏公司（A.S. Watson & Company），並且喺1886年上埋市，1895年之前，屈臣氏响香港已經有35家藥局，真係唔講得笑。