「好嘢嚟喇~哈哈哈~」睇見呢句,各位史友腦入面應該成把肥姐嘅聲浮出嚟,而呢句就係《美味天王》首主題曲嘅第一句。事隔23年,呢套鑽石陣容拍出嚟嘅電視劇將會今日接替《律政新人王II》响深宵時段嘅大台播放,唔知各位史友又期唔期待呢?


《美味天王》係大台30周年果陣嘅台慶劇,大部份場景都喺赤柱取景,全劇一共有29集,當年最高收視有成40點,無論係故事定係演員都大獲好評。


話晒隔咗咁多年,係時候同大家重溫番個故仔。《美味天王》以美食做主軸,入面有間美味園餐廳由秦萬石(秦沛飾)經營,但秦萬石响一次廚神比賽入面輸咗比自己嘅徒弟金一山(歐陽震華飾),自此以後大受打擊,留低間餐廳畀老婆湯圓圓(沈殿霞飾)同埋個蘇蘇(關詠荷飾)。由於蘇蘇係唔識煮野,於是就令到鋪頭嘅客人去曬隔離嘅皇室玫瑰餐廳。金一山見到咁嘅情況,就化名田味吉接近呢兩母女,並且教佢哋重新經營美味園,當中就有唔少鬥氣冤家嘅場面。


呢套劇唔止美味園呢部分,仲有皇室玫瑰大廚喬柏高(古天樂飾)同埋追尋廚神嘅記者夏津津(張可頤飾),到底最尾發生咩事?阿史就等各位史友自己睇番啦!


圖片嚟自網絡