灣仔,一向俾人嘅印象都係商廈林立,又點會諗到城市一隅竟然會有一個文青小社區。現時嘅日街、月街以及星街合稱「日月星街」,由原本普通不過嘅幾座住宅,慢慢演變成一個既有咖啡廳,家品店、酒吧以及藝文空間嘅小社區。唔講唔知,原來「日月星街」講起嚟真係有段故!


日、月、星街係灣仔三條平行東西走向嘅街道,連接聖佛蘭士街至萬茂里,呢三條街嘅命名係取自《三字經》中有一句「三光者,日月星」,到底因乜解究要用「三光者」命名街道呢?翻查饒玖才著作《香港的地名與地方歷史(上)——港島與九龍》,就會發現當中嘅答案。中環、灣仔交界處,即係今日永豐街旁山坡地段,原來曾經係香港電燈公司建立首間發電廠嘅所在之處,呢間响1889年落成嘅發電廠,裝設咗英國直接送嚟嘅發電機。响當時仍然處於烏燈黑火嘅城市,呢幾條燈火通明嘅街道自然就係「漆黑中嘅螢火蟲」啦!


呢座香港第一次興建嘅發電廠,最初嘅目的只係供電俾寶雲道配水庫,令到水源可以直接泵上山頂住宅,後來先慢慢供電俾鄰近嘅督憲府同各間洋行樓宇。之但係,到咗1910年代,灣仔發電廠嘅發電量不足應付需求,於是就改由北角發電廠供電,灣仔發電廠慢慢退役。留低嘅,就係剩低嘅三條街道,成為咗灣仔發電廠嘅歷史印記。


圖片嚟自網絡