烏茲別克舊都撒馬爾罕 有座中亞驚世建築

好耐之前阿史介紹過烏茲別克嘅舊都撒馬爾罕，今次阿史又再次嚟個「地圖旅行」，介紹一下撒馬爾罕嘅雷吉斯坦廣場。

雷吉斯坦廣場係烏茲別克其中一個著名景點，基本上去呢個國家旅行都會去呢個地方遊覽打卡。雷吉斯坦廣場位於撒馬爾罕市中心，矗立咗三座宏偉壯麗嘅經學院，即烏魯伯格經學院、希爾•多爾經學院以及季里雅•卡利經學院。三座經學院分別建於15世紀至17世紀，係中亞建築嘅經典之作。最早出現嘅烏魯伯格經學院，係帖木兒個孫烏魯伯格下令興建。本身係數學家同天文學家嘅烏魯伯格，非常著重學術，所以烏魯伯格經學院成為十五世紀最好嘅穆斯林學府。希爾•多爾經學院就响1619年即烏魯伯格經學院出現200年後建成，當時帖木兒王朝早已結束，埃米爾Yalangtush Bahadur掌管撒馬爾罕幾年之後就下令响烏魯伯格經學院興建新嘅經學院，仲要同舊經學院完全對稱。過咗十年後，埃米爾Yalangtush Bahadur又決定响兩座經學院中間起多一座新經學院。位於雷吉斯坦廣場北面嘅1660年嘅季里雅•卡利經學院就係咁樣出現。