話說阿史前幾日就响西九龍中心食飯,誤打誤撞就發現粱蘇記僅存嘅唯一一間門市。有返咁上嘅史友,就算冇用過都會聽過梁蘇記嘅遮,除咗出名貴之外,「純正鋼骨」同埋「一世保用」都係賣點。唔講唔知,原來「梁蘇記」今年亦都已經踏入135周年。


梁蘇記遮廠由梁智華老先生喺1885年嘅廣州創立,梁老先生原本只係從事「收買佬」工作,後尾因為一次維修洋傘嘅時候,發現並唔難製造,於是就直頭自己整埋,佢都稱得上係第一位整「洋傘」嘅中國人。雖然可能係「山寨」,但梁蘇記遮嘅原材料都係由外國訂返嚟,用料真係揀鋼骨,再加上「一世保修」,令到呢個品牌嘅「黑長遮」响1920年代相當盛行。


講咗咁耐,梁蘇記到底幾時先嚟香港呢?答案就係1941年,當年第一間遮店就响德輔道中開業,梁蘇記全盛時期係70年代,單係粵港澳已經有成十五分店,佢嘅出品仲賣到去外國,真係認真威水!


隨住香港工業起飛,人手造雨遮嘅行業亦都開始沒落,梁蘇記嚟到第四代傳人,就只剩低一間門市。


圖片嚟自網絡