新年前嘅「無情雞」

阿史人生當中都食過幾次「炒魷魚」，至於「無情雞」就真係冇食過，當然亦都唔想試啦！兩個俗語雖然都係解做被老闆解僱，但時間性上又有少少唔同。之前阿史都介紹過，但臨近歲晚自然要同史友們溫故知新啦！

「炒魷魚」就係無定向，幾時都可以發生，至於「無情雞」就只有一個特定時間發生—「尾禡」。傳統廣東地區有一個習俗，就係每年年尾農曆十二月十六，即係全年最後一次做禡之日，老闆都會宴請員工，多謝佢哋辛勞咗一年，呢一即被視為係新年嘅前奏，俗稱「尾牙」、「尾禡」。菜式上嚟講點都會有隻雞，假如老闆用隻雞頭指住你，又或者親自夾件雞畀你食嘅話，咁史友們就真係要小心，因為老闆嘅意思就係叫你另謀高就，執包袱走人。

如果老闆真係請你食雞，原來都要睇清楚係乜部位，下篇再同大家詳講。