之前阿史睇到一個某英國電視台嘅節目，講話响英國東南部諾爾莊園嘅一座古老大宅入面，有一幅描繪清朝書生嘅畫像，經考證後原來係清朝留學英國嘅第一人。

呢位仁兄叫做黃亞東，但關於佢嘅記載就唔多。據知佢1753年响廣州出世，由於當時廣州係乾隆年間唯一一個可以對外通商嘅城市，或者係因為商業味濃，令到黃亞東放棄功名選擇從商。

好地地一個商人又點解會去到英國留學？根據英國專家嘅研究，就話黃亞東係由一個叫做布萊德比·布萊克（John Bradby Blake)嘅英國商人安排，據講呢位商人响東印度公司商船上工作，1766年就已經嚟到廣州一帶收集植物同藥物嘅種子，急需一個專家幫手培育，於是就揀咗肯學肯捱嘅黃亞東。

黃亞東1774年踏入英國領土，最初只係被安排响多賽特三世公爵嘅諾爾莊園做待從。但由於黃亞東有心學習英文同埋科學知識，當時多賽特三世公爵知道後，就安排佢去諾爾莊園嘅七棵橡樹學校，正式展開佢留學嘅生涯。

或者係因為佢中國人嘅身份講得一口流利英文，上流社會嘅人都好鍾意佢，仲同皇家內科醫學院院長安德烈·鄧肯交流過針灸。後來，佢決定要返中國，做一個「海歸」，多塞特三世公爵仲特地搵名畫家雷諾茲畫呢份黃亞東畫像，足足用咗當時70英鎊，大概係依家嘅10000英鎊左右。

至於黃亞東返中國之後點呢？據知佢返咗去中國後，繼續從商，响佢同英國朋友聯絡嘅信件中，就話自己「生意太忙」。至於其他佢嘅事，似乎要有待考證喇。

圖片嚟自網絡