百年老店「甄沾記」椰子糖

就嚟到新年，諗到賀年全盒入面嘅食品，阿史咁多年嚟都仲記得甄沾記嘅椰子糖。其實唔止椰子糖，甄沾記仲有出埋椰子雪糕、椰子雪條，之不過講到果陣椰香味，就一定係揀椰子糖。

唔講唔知，原來呢隻面世105年嘅糖都經歷過一段起起伏伏嘅故事。甄沾記係一個傳統椰子製品嘅品牌，1915年嘅時候創辦人甄倫立只係响街邊賣椰子糖同雪糕，後來街頭街尾都叫甄倫立做「亞沾」，佢就順勢喺1940年代堅道開設首間門市，直頭就叫做甄沾記。

椰子糖當年好巴閉，唔單止响香港暢銷，仲賣到出美加，訂單多到做唔曬。於是1953年，甄倫立個仔甄彩源就打算乘勝追擊，响當年仲係好荒蕪嘅黃竹坑買地起廠。四層嘅廠房經過開山填海，用咗5年時間先起完，最後仲要靠黃竹坑嘅水上人家幫手做工人，先頂得住。據聞當年嘅黃竹坑，淺灘係堆滿椰殼，充斥住椰子味。