歷史上有唔少動亂或者革命都同宗教扯上關係，好似清朝咁，就曾經出現白蓮教起事以及太平天國之亂。讀過中史嘅都知，多年嚟都有人討論創立拜上帝會、建立太平天國嘅洪秀全，算唔算係基督徒呢？

話說洪秀全25歲時，三次去考府試都失敗收場，仲大病一場，响病緊期間，佢就有幻覺指有一個老人家叫佢嚟到人間斬妖除魔。呢次大病令到洪秀全性情大病。六年後洪秀全再次考廣州府試，機緣巧合之下佢接觸到基督徒梁發《勸世良言》一書，就覺得書入面嘅內容同佢六年前見到嘅幻覺極為相似，仲認為果位老人家就係上帝，而自己仲係「上帝之子」。自此以後，佢放棄孔孟之道，改信基督，未讀過《聖經》但就周圍同人傳教，仲成立埋「拜上帝會」。

洪秀全最初响廣州傳教並唔成功，後來同馮雲山一齊番去廣西，先增加到一班信徒。1851年佢响廣西桂平金田村就發起起義，從南到北，一直打到去南京，建號太平天國，自己就叫做天王。

洪秀全創立拜上帝會，到後建立政教合一的國度，不過對於佢係咪一位真正嘅基督徒，多年嚟都有唔少爭議。好似拜上帝會唔少宗教禮儀，都係屬無師自創，中西混合，包括受洗儀式。而最具爭議嘅一點，就始終係洪秀全對《聖經》以及成套基督教宗教信仰都依據自己嘅解釋，呢一點亦係西方國家最後轉為支持滿清政權嘅其中一個原因。最初來華傳教士對中國國土出現一個基督教政權都感到鼓舞，部分國家亦認為太平天國同佢哋「同聲同氣」，有利佢哋响中國傳教以及開放港口。對於太平天國對基督教的錯誤解讀亦覺得可以慢慢糾正。不過，隨住日子過去，洪秀全等人對傳教士以及西方國家無太多關照，反而响《天津條約》同《北京條約》簽訂後，清廷同英法兩國關係有所改善，最後仲協助清政府對付太平天國。

所以，有意見就話，洪秀全雖然係拜上帝，但只能算係異端。至於係唔係呢？留返史友們自己判斷喇！

圖片嚟自網絡