大大公司 全港首創逢星期日八折

上星期就同各位史友介紹過大丸百貨，大家都話回憶滿滿，就想阿史講多幾間，而阿史回憶當中，大大公司都係當年香港市民成日去幫襯嘅百貨公司。

大大公司，英文就叫DaDa，由商人楊撫生創辦1974年以當時1,000萬資本創立，當年嘅總店就係今時今日太子聯合廣場嘅底層。提起大大公司，最威水就當然係佢哋首創嘅「逢星期日全店所有貨品八折優惠」，結果每逢星期日都逼爆全場。而當信用卡嘅風潮興起，佢哋又試過「推出信用卡購物八折優惠」，認真識撈。阿史就最記得太子呢間大大，入面就整咗碰碰車，仲有個模型火車場景，每次去都圍咗好多小朋友一齊玩。當年冇乜錢又想有玩具，就真係要上頂層「特價部」睇上有乜筍野執。

全盛時期嘅大大公司，荃灣、香港仔同北角都有佢哋嘅分店，連同大元公司、大人公司都係佢咃集團旗下。只係去到1985年，受到服市衝擊同埋欠債等問題，先畀匯豐接管，最後仲停業清盤，成個百貨王國就咁結束。