星爺套《鹿鼎記》入面,就有一幕係多隆拎住把尚方寶劍想斬殺平西王吳三桂同埋佢個仔吳應熊,而呢兩父子就一齊爭奪一塊大大隻刻住「免死」嘅金牌,諗起果幕認真好笑。之不過,免死金牌又係咪真係存在,又可唔可以保住自己條命仔呢?


歷史上免死金牌,其實即係「丹書鐵券」、又有「丹書鐵契」或者「誓書」嘅叫法。「丹書鐵券」最先係由漢朝劉邦為鞏固功臣而頒授,目前存世嘅鐵券就有四件。顧名思義「丹書鐵券」既唔係黃金,亦都唔係一塊牌,而係由皇帝賞賜嘅一塊半圓形鐵板。「丹書鐵券」本身就係一整塊,但為咗提防假冒,就會分割成兩塊,一塊留响皇宮,而另一塊就由被賞者保管住。呢塊鐵板會清楚寫明賞賜日期、被賞者、官職同埋有咩特權,就好似明英宗朱祁鎮賜畀右軍都督府都督李文果塊咁,上面有註明「食祿一千石……免爾本身一次死」。



咁到底「丹書鐵券」係咪真係免死呢?咁就要視乎券上有冇寫明,大多數嘅鐵券只係賜官封地,就算有寫明免死都好,想殺你嘅係皇帝,區區一塊鐵板真係未必保得你住。


圖片嚟自網絡