話說阿史前幾日大掃除執屋,執執下响堆舊書入面竟搵到張以前玩天下太平淨低落嚟嘅紙,咁就幾十年,真係令人懷念。唔知後生嘅史友,又識唔識玩呢個遊戲呢?


天下太平呢個遊戲大概就係上世紀60到90年代之間盛行,基本上玩家都係小學生,每逢小息、放學或者上緊堂,都會有同學仔喺度玩緊。呢個遊戲基本上只需要一枝筆就玩到,試過冇紙果陣,同學仔直接用張檯嚟玩。


講咁耐,到底仲記唔記得點玩呢?阿史依稀中都仲記得一開始係要先畫四個格,跟住就同另一個玩家猜包剪揼,贏一次就可以寫「天下太平」入面一隻字,寫完之後就係繼續猜畫三枝旗,之後就到加保護罩。防衛設施起完,就可以起大炮或者火箭去拆對面個城,由於包剪揼係有輸有贏,玩完嘅時候基本上差唔多落堂。


圖片嚟自網絡