今年响農曆新年檔期上映嘅電影，阿史注意到一部好特別嘅電影，叫《中國女排》，由鞏莉做女主角，而呢部電影講嘅其實係中國女排傳奇人物，有「鐵榔頭」之稱嘅郎平。呢部電影就係以佢執教生涯為主軸，帶出中國女排嘅高低起跌。

郎平可以話係中國家傳戶曉嘅人物，基本上提起中國女排唔少人都會提起佢，咁係因為無論佢响球員生涯抑或教練生涯，都帶領中國女排走上世界之顛。郎平响1973年被選入北京工人體育館體校排球班，之後進入北京市女排，1978年入選國家隊。當時中國女排目標就係衝出亞洲，結果中國女排响1981年奪得世界盃冠軍，之後仲贏埋1982年世界女排錦標賽冠軍同1984年洛杉磯奧運會金牌，協助中國女排取得「三連冠」。而當時作為隊中主攻手嘅佢，係隊中不可或缺嘅主將，因此深受國人愛戴。

佢响退役後無幾耐，就去咗美國讀書深造，後嚟做咗排球教練。仲响1995年成為中國女排國家隊教練，帶領球隊攞到1996年奧運亞軍，而佢就响1998年辭職。2005年，佢就成為咗美國女排國家隊教練，更有趣嘅係，佢响2008年北京奧運會上，帶住美國隊對中國隊，結果美國隊以局數3比2反勝中國隊，最後美國隊亦攞到奧運銀牌。

到咗2013年，郎平又再次獲委任為中國女排教練，而响佢帶領之下，成功重建中國女排，成為一支具競爭力嘅球隊。响佢帶領之下，中國女排响2015年再獲世界冠軍頭銜；2016年里約奧運亦贏得金牌；2018年贏得亞運金牌；2019年以十一戰全勝佳績，蟬聯世界盃冠軍。

郎平响球員時代以至職業生涯都為中國女排贏盡殊榮，所以佢响中國國民心目中地位都相當崇高，《中國女排》呢套電影以佢嘅事績作為故事主軸，都相當合情合理。

圖片嚟自網絡