84歲鍾南山 2003年抗擊非典英雄

史友們對鍾南山呢個名應該唔會陌生，身為國家衛健委專家組組長嘅佢，近日多次就住武漢肺炎嘅疫情提出建議同埋詳細嘅措施，點解佢會咁有經驗？咁就同佢17年前參與過嘅抗擊「沙士」嘅經驗有關。

鍾南山現年已經84歲，係呼吸道疾病方面嘅專家。早年就曾經去過英國進修醫術，期後就出任世界衛生組織醫學顧問、廣州醫學院院長，基本上已經係廣東醫療衛生界學術地位最高嘅一位。

2003年2月，廣東開始爆發不明嘅肺炎，鍾南山就經過自己觀察，制定咗一套救治「沙士」危重病人嘅方法，再配合中藥抗流感嘅防治措施，令到廣東沙士死亡率降到全國最低，當時世衛專家都認為佢呢套方法對世界抗擊非典型肺炎有好大幫助。2003年6月，鍾南山更被評為「抗擊非典第一功臣」。