就嚟過年,唔知史友們準備好賀年禮品未呢?從以往到依家,唔少賀年禮品(食品)都係會以鐵盒入住,無論糖好蛋卷好曲奇餅好,都係咁樣。其實大家有無諗過點解呢?


其實廠商們呢個做法,係同香港嘅氣候有關,因為香港天氣相對潮濕,即使冬天都有機會濕度偏高。潮濕對食物存放絕對係一大考驗。所以,為保持食品嘅新鮮度(其實就係無咁易變淋同變質),就搵鐵罐作為盛載器具。好似嚟自丹麥牌子嘅曲奇,初嚟香港個陣,羅保爵士試食之後就提議廠方用鐵罐,以免啲餅淋晒。


講開又講,呢啲食品鐵罐對上一代香港而言有另一種意義,就係成為儲存工具,例如將啲錢、證件等放入個鐵盒,依家唔少老人家都仍然沿用呢個方法儲嘢,堅係香港特色。


圖片嚟自網絡